1. Antes de nada,
cóntanos a túa traxectoria como futbolista.
A miña vida
futbolística empeza con 14 anos no xuvenil da S.D. Brollón, logo
paso á disciplina do C.P. Calasancio, permanecendo no xuvenil B
un ano e dous no xuvenil A, disputando a Liga Nacional.
Incorpórome ao Lemos B sen poder xogar por lesión; tras a
recuperación formo parte da S.D. Sober tempada e media, índome
para o Ferreira C.F., onde levo dúas tempadas e media.
2. A pasada campaña,
por primeira vez na historia do Ferreira, conseguistes o
ascenso; ¿como se viviu?
A verdade é que non
puidemos gozar de semellante acontecemento como merecésemos, xa
que é por todos coñecido que ascendemos tras a renuncia do
Riotorto. Por este motivo non puidemos celebralo con autobús
descapotable e estas cousas, pero estou seguro que o gozaremos
durante a tempada enfrontándonos a equipos con tanto nome como
Compostela, Viveiro, Bergantiños... e Chantada, por suposto.
3. ¿Como afrontades
esta tempada en Preferente?
Con humildade e moito,
moito traballo, xa que case a totalidade do equipo somos novatos
nesta categoría e así poderán compensar o noso descoñecemento.
Este é o camiño para conseguir que o Ferreira logre a
permanencia e poder así celebrar o que non puidemos a tempada
pasada.
4. Pasemos a falar xa
da competición: empezastes con derbi, ante a Sarriana, e
vencestes, por dous tantos a un ¿como foi ese partido?
Foi un partido moi
disputado, como reflicte o marcador, xa nos coñeciamos moi ben
da tempada pasada. O partido empezou con moitos nervios pola
nosa parte, supoño que debido ao debut nesta categoría, onde a
Sarriana puido aproveitar un par de ocasións. Co paso dos
minutos pasamos a posuír o balón, co que conseguimos adiantarnos
no marcador.
Ao inicio da segunda
parte, por relaxación do equipo, iguálannos o partido, e xa
avanzado este período marcamos o segundo, axudados polo aspecto
físico, posto que apreciei á Sarriana un punto por debaixo nosa
fisicamente, aínda que no referente a técnica teñen moi bos
xogadores.
5. ¿Como afrontades o
partido da próxima fin de semana ante o Viveiro?
Con moitas ganas e
ambición, pero con respecto, xa que se trata dun dos históricos
de Galicia. Tamén temos a incógnita de como responderá o equipo,
pois trátase do noso primeiro desprazamento e os equipos sabemos
que non rendemos igual na casa que fóra.
Espero que sexa un
partido bonito e poidamos sacar algún punto, que falta farán.
6. E tamén acabades
con derbi, ante a S.D. Chantada, mellor que ningún dos dous teña
que xogar nada no último partido, ¿non?
Certo, sería sinal das
cousas ben feitas ou dunha tempada aciaga, que esperemos que non
aconteza. Creo que é a mellor forma de rematar a tempada, porque
aínda que chegues a este partido sen xogarte os puntos sempre
está o gusanillo de gañarlle ao veciño; iso si, con
deportividade e rivalidade sa.
